上星期六教會弟兄邀請我哋去佢屋企打邊爐，我講起嚟緊去睇Mirror演唱會，大家都好驚訝點解我會捧場。
2018年媽媽患上末期癌症，記得當日我身處英國，哥哥致電告知後，晚上由倫敦回港趕到醫院探望媽媽。由佢病發到離開，由籌備安息禮到出席安葬禮，完成後感到身心俱疲，要放下重新出發，嗰陣正值ViuTV播全民造星第一輯…睇完第一集，3個字…「公平咩？」真係夠晒騎喱，但睇得好開心，令我最開心係個旁白夠mean。
人最叻係咩？就係評頭品足，呢個節目啱晒我哋呢啲自己冇膽量去做，淨係識剥花生嘅人。睇住99個參賽者一路比賽到最後，仲可以網上投票選冠軍，雖然我當時認為姜濤冇得輸，但最後決定投Ian一票，因為我唔係勝利球迷，比起估中有獎嘅感覺，我更喜歡嘗試去改變現。
其實我唔係鏡粉，但見到佢哋就有一種莫名其妙親切感，感謝佢哋陪伴我走過失去至親嘅日子。親眼睇住佢哋（特別係其中幾個）由零開始、蛻變，雖然仍然有唔少瑕疵，但不斷成熟進步，原來去現場捧場就係對自己呢五年幾嘅交代。
多謝你哋嘅努力，我呢個資深少女呢晚睇得好開心🥳
沒有留言:
張貼留言